མི་ཚེ་ནང་གི་ལམ་སྒྲོན་གསུམ།

དུས་རབས་ཉི་ཤུ་པའི་དུས་དཀྱིལ་ཙམ་ལ།  རྒྱ་ནག་ཏུ་ཕུལ་དུ་བྱུང་པའི་སློབ་ཆེན་གྱི་སློབ་སྤྱི་ཞིག་ཡོད། སློབ་གྲྭ་དེར་ལོ་ལྟར་སློབ་མ་མང་པོ་བསྡུ་བཞིན་ཡོད་པས།  ཁོང་ལ་ལྐོག་རྔན་ཕུལ་མཁན་དང་སྤྲེལ་ལད་འཁྲབ་མཁན་ཡང་མང་བོ་བྱུང་།  འོན་ཀྱང་། ཁོང་གིས་ཁྱིམ་བདག་རྣམས་ལ་ཐུགས་རྗེ་ལེགས་འབུལ་ཞུ་བ་ལས། ལྐོག་རྔན་གཏན་ནས་བླངས་མྱོང་མེད།  ཉིན་ཞིག་སློབ་སྤྱི་ཕྱི་རོལ་ཏུ་བསྐྱོད་སྐབས་ཁྱིམ་བདག་ཅིག་གིས་རིན་གོང་ཆེ་བའི་ཇ་སྐམ་ཤོག་ཁུག་གཅིག་དང་ཐ་མག་སྒམ་གཉིས་ཁོང་གི་ཁྱིམ་དུ་བསྐྱལ།

ཁོང་ཕྱིར་སླེབས་རྗེས་ལྐོག་རྔན་སྤྲོད་མཁན་གྱི་ཁྱིམ་བདག་དེའི་སྡོད་གནས་གསལ་པོར་རྟག་ནས་དངོས་པོ་དེ་དག་གི་རིན་གོང་ཁྲོམ་རའི་གཅིག་མཚུངས་ལྟར་སྦྲགས་ཁང་བརྒྱུད་ནས་ཕྱིར་བསྐུར། ཁོང་ལ་མི་གཞི་བཟང་པོ་དེ་འདྲ་ཞིག་ཡོད་པས།  བརྩི་བཀུར་དང་དད་གུས་བྱེད་མཁན་གྲངས་ཀྱིས་མི་ལོངས་པ་ཡོད།

 ཁོང་གིས་མི་ཚེ་ལ་མཇུག་བསྡོམས་འདི་འདྲ་ཞིག་བརྒྱབས་འདུག  མི་ཚེའི་ལམ་བུར་མི་གཞི་བཟང་པོའི་འོད་སྟོང་འཕྲོས་ནས་མདུན་བསྐྱོད་བྱ་དགོས་ན། ལམ་སྒྲོན་མང་པོ་ཡོད་པའི་ནང་ནས་གཤམ་གྱི་ལམ་སྒྲོན་གསུམ་དེར་ངེས་པར་དུ་འབད་བརྩོན་བྱ་དགོས།

ལམ་སྒྲོན་དང་པོ་ནི་དྲང་བདེན་ཡིན།

ང་ཚོས་བྱ་བ་གང་ཞིག་སྒྲུབ་རུང་ཆུ་ཕོར་པ་གང་འཁྱེར་བ་བཞིན་དྲང་པོ་དགོས། མི་གཞན་གྱིས་སྒྲུབ་པའི་ལས་བཟང་དག  རང་དང་རང་གི་མཐའ་འཁོར་ཚོས་མ་སྐུལ་དང་བླངས་ཀྱིས་བསྒྲུབ་དགོས། གཞན་གྱིས་མི་ལས་པའི་ལས་ངན་གྱི་གྲིབ་མ་དེ་དག  ཁྱེད་དང་ཁྱེད་ཀྱི་མཐའ་འཁོར་ཚོའི་ཐོག་ཏུ་གཏན་ནས་སླེབས་མི་སྲིད། བྱ་བ་དྲང་པོར་སྒྲུབ་ན་གཞན་གྱིས་ཁྱེད་ལ་ཡིད་ཆེས་དང་། རྒྱབ་སྐྱོར། བསམ་གཞིགས་བྱེད་ངེས་ལ།  རང་ཉིད་ཀྱི་བྱ་བཞག་ཀྱང་བློ་བདེ་བག་ཕེབས་ངང་སྒྲུབ་ཆོག

ལམ་སྒྲོན་གཉིས་པ་ནི་ངོ་ཚ་ཡིན།

ང་ཚོས་དུས་ནམ་ཡང་གཞན་དང་གཞུང་གི་རྒྱུ་ནོར་ལ་ཧམ་ཟ་བྱེད་མི་རུང་། རང་ཉིད་ཀྱིས་མི་གཞན་གྱི་ཅ་དངོས་ཅི་ཞིག་ཡིན་ཡང་དེ་ལ་འདོད་སེམས་བཅངས་མི་རུང་། མི་ཞིག་ཡིན་ཕྱིན་ངོ་ཚ་ངེས་པར་དུ་དགོས། རང་ཉིད་ཀྱིས་བྱ་བ་ལོག་པ་དང་ནོར་འཁྲུལ་བྱས་ཚེ་དེ་ལ་ངོ་གནོང་སྐྱེ་དགོས། དེ་གང་འདྲ་བྱས་ནས་བསྒྱུར་བཅོས་གཏོང་མིན་བསམ་ཕོད་པ་དགོས། སྔ་མོའི་གཏམ་དཔེར། དྲང་བདེན་ནི་མིང་གྲགས་དང་།  ངོ་ཚ་ནི་བརྗིད་ཉམས་ཡིན་ཞེས་པ་ལྟར། རང་ཉིད་ལ་ཐོབ་པ་དང་མི་ཐོབ་པ་གཉིས་དབྱེ་བ་གསལ་པོ་འབྱེད་ཐུབ་པ་དང་།  རང་སྐྱོན་ངོས་ལེན་བྱེད་ཐུབ་པ་ཞིག་ཡོད་ན་གཞན་གྱིས་ཁྱེད་ལ་བློ་གཏོད་སྲིད་ལ།  ཁྱེད་ཀྱི་བརྗིད་ཉམས་ཀྱང་ཡར་ངོའི་ཟླ་བཞིན་འཕེལ་སྲིད།

ལམ་སྒྲོན་གསུམ་པ་ནི་བྱམས་བརྩེ་ཡིན།

 གཞན་གྱི་གནས་བབ་ལ་ཐུགས་འཁུར་དང་བསམ་གཞིག་ཐུབ་པ་དགོས། འཇིག་རྟེན་འདིའི་སྟེང་གི་མི་སུ་ཞིག་ཡིན་རུང་།  སྤྱི་ཚོགས་འདིའི་འོད་ཟེར་ལོ་ངོ་བཅུ་ཕྲག་འགར་གཡར་བ་ཙམ་ཡིན། སྤྱིར་བཏང་མི་ཚང་མས་སྐྱེ་འཆི་ནི་མི་རྟག་པ་ཞིག་ཡིན་པ་ཤེས་ཡོད། དེ་བཞིན། རྒྱུ་ནོར་དང། གོ་ས། མིང་གྲགས་སོགས་ཀྱང་མི་རྟག་པའི་རང་བཞིན་ཏུ་གྱུར་ཡོད།  སྤྱི་ཚོགས་འདིར་དངོས་ཡོད་ཀྱི་དོན་སྙིང་ལྡན་པ་ནི་སེམས་བསམ་པའི་བྱམས་བརྩེ་དེ་ཡིན། དངོས་ཡོད་ཀྱི་བདེ་སྐྱིད་ནི་བྱམས་བརྩེ་ཡིས་སྐྲུན་བཞིན་ཡོད། དེར་བརྟེན། ང་ཚོས་ཀྱང་བྱམས་བརྩེ་དེ་ལག་ལེན་ཐུབ་ན་གཡར་ཡོང་བའི་ལུས་པོ་འདི་ཡང་སྟོང་ཟད་དུ་མི་འགྲོ་བས་མི་ཚད། འོད་ཟེར་སྟོང་ལྡན་གྱིས་ཁེངས་པར་འགྱུར་སྲིད་པས། མི་རྣམས་ཀྱིས་བྱམས་བརྩེ་ལ་འབད་རོགས།

བྱམས་བརྩེ་ནི་མི་བུ་ཞིག་གི་སྒྲུབ་བྱ་གཙོ་བོ་ཡིན།

མི་ལ་ལས་མི་ཚེའི་ནང་ལམ་སྒྲོན་གསུམ་པོ་དེ་དགོས་པ་མི་ཤེས་སྟབས། མི་གཞི་དོར་ནས་རྒྱུ་ལ་རྔམ་པ་དང། ངོ་ཚ་སྐྱུར་ཏེ་གོ་སར་སྙེག་པ། ལ་རྒྱ་དོར་ནས་མིང་གྲགས་སྐྲུན་པ་སོགས་ཀྱི་ལས་འདྲ་མིན་བྱེད་ཀྱི་ཡོད་པ་རེད། གཅིག་བྱས་ན་མི་དེ་ཚོས་ལམ་སྒྲོན་དེ་དག་གིས་རང་ཉིད་ཀྱི་མི་ཚེའི་ལམ་བུར་འོད་ཟེར་འཕྲོ་གི་ཡོད་པ་མི་ཤེས་པ་མིན་པར་ཁོང་ཚོའི་སེམས་ཁམས་ལ་འོད་ཟེར་འཚམས་ཀྱི་མེད་པ་དང་། མི་གཞན་གྱི་མིག་ཟུང་རིག་མི་ཉན་པ་ཡིན་པས། མཐའ་མར། ཁོང་ཚོའི་འཚོ་བའི་ནང་སྐྱོ་གར་གྱི་ལེའུ་རྫོགས་རྒྱུ་མེད། མི་དེ་ཚོའི་ལོ་རྒྱུས་ཀྱང་དྲི་ངན་བྲོ་བའི་གད་སྙིགས་ཕུང་པོ་ཞིག་དང་འདྲ་པོ་རེད།

ཡར་འཇོག་མཁན་། : སྟག་རྩེ་བུ་མོ།

རྩོམ་པ་པོ། :  ཀྲང་ལེང་།

ཡོང་ཁུངས། : རྒྱ་ནག་གི་མཐོ་རིམ་སློབ་མའི་ཤེས་རབ་སྐོར་གྱི་སྒྲུང་གཏན་ཕྱོགས་སྒྲིག